Вы ўбачыце, шаноўныя сябры, яркі, прыгожы, эмацыйна багаты, надзвычай кранальны харэаграфічны спектакль, які завяршае цыкл канцэртаў “Харошкі. Жывая легенда беларусаў”. У спектаклі гучыць тэма складанага, трагічнага лёсу жанчыны падчас вайны. Праграма напоўнена шчымлівымі, пранікнёнымі лірыка-драматычнымі нумарамі… Але будзе на сцэне і сапраўднае свята, сімвал адраджэння і светлай надзеі – “Беларускае вяселле” – выдатная харэаграфічная сюіта, якую складаюць гулліва-жартоўныя танцы-сцэнкі. Артысты выконваюць іх з запалам, радасным натхненнем, яркімі эмоцыямі і пачуццямі.
Канцэрт пройдзе пад жывую музыку ў суправаджэнні вакальна-аркестровай групы ансамбля “Харошкі”.
Тэатралізаваная праграма “Ад смутку да вяселля” будзе прымеркавана да Дня Перамогі. Сардэчна запрашаем адзначыць свята разам з ансамблем “Харошкі”, атрымаць асалоду ад выбітнай харэаграфіі, прасякнутай любоўю да нашай роднай зямлі і яе традыцый!
Да сустрэчы 12 мая 2023 г. у Нацыянальным акадэмічным тэатры імя Янкі Купалы (г. Мінск, вул. Энгельса, 7). Пачатак а 19-ай гадзіне.
Даведкі і замова квіткоў па тэлефоне: +375 29 693 25 08.
Запрашаем таксама набыць квіткі анлайн на сайтах www.khoroshki.by i www.kupalauski.by
6 мая праграму “Ад смутку да вяселля” ансамбль “Харошкі” пакажа на сцэне Мазырскага драматычнага тэатра імя Івана Мележа.
